«Fevral 26» işi boyunca Rusiye taqiqat organlarına sorğuğa çağırılğanı sebebinden Ankarağa kelip olamağan Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev dey ki, qırımtatarlar, II Bütündünya qırımtatar kongressini keçirip, «Qırımda keçken ve alâ daa olayatqan adiseler boyunca halqnıñ mevamını bütün dünyağa kösterdiler».
«Kongresste muzakere etilgen bütün sualler boyunca birligimizni kösterdik», – dey Smedlâyev Qırım.Aqiqat mühbirine.
Bundan da ğayrı, o dey ki, Türkiye prezidenti Recep Tayip Erdoğannıñ qırımtatar halqınıñ yetekçisi Mustafa Cemilev ve Meclis reisi ve Kongress prezidenti Refat Çubarov ile körüşüvinden soñ «halqnıñ sesi dünyada ve, ilk nevbette, Türkiye Cumhuriyetinde, kâfi derecede eşitildi».
Avgust başında Türkiye paytahtı Ankarada II Bütündünya qırımtatar kongressi keçirildi. Mında qırımtatarlarnıñ Vatanı – Qırımdaki vaziyetleri muzakere etildi. Toplaşuv devamında Kongress prezidentini sayladılar ve dünya toplulığı, qırımtatarlarğa bir sıra muracaat ve beyanname qabul etildi.
