Türkiyeniñ içtimaiy ve medeniy institutları yarımadada yaşağan qırımtatarlarğa qol tutmalı. Faqat, 2014 senesi Qırımnıñ işğalinden soñ Türkiye ve Qırım arasında resmiy bağ bütünley üzüldi. Bu aqta Yeni Akit Türkiye gazetası yaza.
Qırım meselesinde Türkiye Ukraina topraq bütünliginiñ tarafdarıdır, dep yaza neşir. Aynı zamanda, Rusiyege nisebeten Avropa birligi, AQŞ ve NATO siyasiy ve iqtisadiy cezaları olğan yerde, Türkiye Rusiye ile ciddiy siyasiy ve iqtisadiy işbirligini devam ete.
«Ne yazıq ki, qırımtatarlar qazanğan destegini körmeyler. Qırımtatarlarnıñ siyasiy mevamı Kosovo, Makedoniya ve Şarqiy Turkistanda yaşağan insanlarnıñ mevamına pek yaqın», – denile maqalede.
Şarqiy Turkistan (Uyğurstan) – Orta Asiyada Qıtay terkibine kirgen regionnıñ tarihiy serlevasıdır. Nice yıllar devamında uyğurlar mustaqillik içün milliy-azatlıq isyanlarnı keçire ediler.
Ankarada Bütündünya qırımtatar kongressi devamında Türkiye yolbaşçılığı qırımtatar halqına ve Ukraina topraq bütünligine destegini bildirdi.
Türkiye, Ğarp memleketleri kibi, Rusiyeniñ Qırım işğalini tanımay.
