Qırımda Ermeni Bazarnıñ şeer mahkemesi Aqmescit rayonınıñ 45 yaşında sakini Edem Ebulisovnı qabaatlı tanıdı ve para cezasını berdi.
Bu aqta Qırımnıñ Rusiye prokuraturasınıñ matbuat hızmeti bildire.
Bildirilgeni kibi, faalni Rusiye cinaiy kodeksiniñ 318 maddesi 1-inci qısmı boyunca qabaatlı tanıdılar – akimiyet temsilcisine zarar ketirüv.
«2014 senesi mayıs 3 künü «Ermeni Bazar» kiriş noqtası rayonında maküm etilgen şahıs vatandaşlarnıñ qanunsız sürette sıñırdan keçmemesini nezaret etken «Berkut» batalyonınıñ №1 bölüginiñ militsionerine zarar ketirdi», – denile Qırım prokuraturasınıñ beyanatında.
Mında şunı da qayd eteler ki, maküm etilgen qabaatını tanıdı ve nedamet etti, bu sebepten oña 40 biñ ruble miqdarında para cezası berildi.
Bu aqta maküm etilgenniñ ve imayesiniñ izaatları şimdilik yoqtır.
İşbu ciniay iş Qırımnıñ Rusiyeli prokurorı Natalya Poklonskayanıñ teşebbüsi ile açıldı.
Aqmescit sakini, 1970 senesi doğğan Edem Ebulisovnı noyabr 25-de yaqaladılar. Dekabr künü onı SİZOdan azat ettiler. 2014 senesi mayıs 3 künü numayışta iştirak etken 4 qırımtatarı yaqalanğan edi, olardan soñ nevbette Edem Ebulisov azat olundı.
