Link açıqlığı

Türkiye prezidenti Recep Tayip Erdoğan avgust 3 künü Ankarada qırımtatarlarnıñ yetekçileri Mustafa Cemilev ve Refat Çubarov ile körüşüvi vaqtında Türkiyeniñ Rusiye ve Qırımğa nisbeten mevamı deñişmeycegi aqqında bildirdi.

Bu aqta Ukraina prezidentiniñ qırımtatar işlerinden vekâletlisi Mustafa Cemilevniñ matbuat hızmeti bildire.

«Şahsiy körüşüv devamında Recep Tayip Erdoğan qırımtatarlarnıñ yetekçilerini Türkiye Cumhuriyetiniñ Rusiye tarafından Ukrainağa qarşı istilâsı ve Qırımnıñ Rusiye işğalinden azat etilmesi ile bağlı siyasetiniñ deñişmeycegine ve izçen olacağına işandırdı», – denile beyanatta.

«Bugün olğanı kibi, kelecekte de yardımımızğa işana bilesiñiz. Eminim, qırımtatar halqınıñ birleşüvi şaraitlerinde, sulh ve havfsızlıq negizinde keçken Bütündünya kongressi küreşiñizni arttırır», – dep bildire Türkiye prezidentiniñ sözlerini onıñ matbuat hızmeti.

Malüm olğanı kibi, qırımtatar yetekçileriniñ Erdoğan ile körüşüvi qapalı şekilde keçirildi.

İndonesia ziyaretinden sebep Erdoğan raatlıq künleri Ankarada keçirilgen Bütündünya qırımtatar kongressinde iştirak etip olamadı. Kongress iştirakçilerine yollağan muracaatında Erdoğan Qırımda qırımtatarlarnıñ havfsızlığı Türkiye içün esas vazife olğanını bildirdi. Türkiye yetekçisi qırımtatar halqına ileride de yardım etmege söz berdi.

XS
SM
MD
LG