Link açıqlığı

Ukraina Rusiyege qarşı qırımtatar aqlarınıñ bozuluvı boyunca ECtHR davanı azırlay – Petrenko


Ukraina adliye nazirligi Rusiyege qarşı işğal etilgen Qırımda insan aqlarınıñ bozuluvı sebebinden İnsan aqları boyunca Avropa mahkemesine (ECtHR) dörtünci davanı azırladı.

Bu aqta Ukraina adliye naziri Pavlo Petrenko bildirdi.

«İnsan aqları boyunca Avropa mahkemesine dörtünci devletlerara şikâyetiniñ berilmesini ilân etmege isteyim. Bu arizada Qırımda insan aqlarınıñ, şu cümleden, qırımtatar aqlarınıñ bozuluvı aqta söz kete. Biz Qırımda ukrainlerniñ siyasiy taqibi aqqında sualni köteremiz», – dedi o.

Adliye naziriniñ sözlerine köre, keleсеk afta nazirlik delillerniñ resmiyleştirüvini bitirecektir.

Evel Ukraina İnsan aqları boyunca Avropa mahkemesine Rusiyege qarşı Qırım işğali ve Donbass zidiyeti ile bağlı üç davanı taqdim etti.

2014 senesi mart ayında Rusiye Qırımnı işğal etti. Uquq qoruyıcılar Qırımda işğalden soñ insan aqları ile bağlı vaziyetniñ beterleşüvi aqta bildire.

Avgust başında Ankarada II Bütündünya qırımtatar kongressi keçti, kongresste qırımtatarlarnıñ Vatanı – Qırımdaki vaziyeti muzakere etildi. Şu cümleden, bildirilgeni kibi, Sovet Birliginiñ dağıluvından soñ Qırımğa qaytqan 350 biñ qırımtatarı şimdi kene totalitar basqığa oğray ve yoq olmaq havfı astında buluna. Yarımada Rusiye tarafından işğal etilgeninden soñ 15 biñ qırımtatarı Qırımnı terk etmege mecbur oldı.

XS
SM
MD
LG