Keçken raatlıq künleri Aqmescit merkezinde belgisiz şahıslar «Yanı dünya» qırımtatar gazetasınıñ muarririyetini abrap kettiler.
Bunı Qırım.Aqiqatqa neşirniñ baş muarriri Zera Bekirova bildirip, bundan evel muarririyetniñ darma-dağın etüvi aqqında diger matbuat vastalarında yazılğan malümatnı red etti.
«Hırsızlıqtır, qapını anahtar ile açtılar, evel anahtarımız coyulğan edi, işbu anahtarnen, ğaliba, muarririyetniñ ekinci qatında qapını açıp, bütün tehnikanı çıqardılar – bilgisayarlar, printerler, fotoapparatlar, router, modemler. Bizni internetten kestiler», – dedi o.
Neşirniñ baş muarriri işbu vaqiada «siyasiy eser»ni körmegenini bildirdi.
«Politsiyağa muracaat etik, tünevin parmaq izlerini aldılar, cinaiy iş açıldı, endi taqiqat neticelerini bekleymiz», – dey Zera Bekirova.
Onıñ sözlerine köre, ilk zararnıñ miqdarı – 100 biñ rubleni teşkil ete.
«Yañı dünya» – işğalden soñ yarımadada işine devam etmek içün Rusiye qaydını alğan qırımtatar neşirlerinden biridir. Roskomnadzornıñ malümatına köre, gazetağa mütenasip izin 2015 senesi aprel 15 künü berildi.
