Link açıqlığı

Keçken raatlıq künleri Aqmescitte «halq imayesiniñ» vekilleri politsiya ile birlikte demir yol vokzlanıda trezubets ile futbolkanı kiyip kezgen ösmürni yaqaladılar.

Bu aqta Qırım «halq imayesiniñ» saytında aytıla.

Teşkilâtta deyler ki, oğlanda «ekstremist basma malümatlarını» tapqanlar.

«Vesiqalarnıñ teşkerüvinden soñ oğlanda ekstremist nakleykalar tapıldı. Olarda Qırımnıñ Ukrainağa qaytuvına çağıruvlar basılğan», – denile beyanatta. Bunıñ ile şunı qayd eteler ki, oğlannıñ «Azov» ukrain batalyonınıñ faaliyetini rağbetleştirgen malümatlar yanında edi eken.

Beyanatqa köre, bütün bularnı musadere etip, uquq qoruyıcılar ösmürni evge yolladılar.

İşbu malümatnıñ diger qaynaqlardan tasdiqlavı yoqtır. Ösmürniñ adı ve soyadı bildirilmey.

2014 senesi mart ayında Rusiye Qırımnı işğal etkeninden soñ, yarımadada ukrain tarafdarlarını taqip etmege başladılar, ukrain timsalleri ekstremist sayıla. Qırımda bir qaç faalni Taras Şevçenko hatırasına keçirilgen aktsiyada köterilgen ukrain bayrağı sebebinden mahkeme ettiler.

XS
SM
MD
LG