Bütündünya qırımtatar kongressiniñ iştirakçileri iyül 3 künü tedbir keçirilgen Ankaranı terk ete.
Qırım.Aqiqat mühbiri aytqanı kibi, avtobusqa minmezden evel iştirakçiler hatırlaıq foto yapa ve kongress neticelerini muzakere eteler.
Forumda bazar künü, avgust 2-de, qabul etilgen yekünleyici beyannamede öz-özüni belgilev aqqı yalıñız Qırımnıñ tarihiy ve tamır halqı olğan qırımtatar halqına ait olğanı qayd etile.
«Rusiye Federatsiyası tarafından etilgen qanunsız Qırım işğaliniñ acele toqtatılması ve Ukraina topraq bütünliginiñ ğayrıdan tiklenüvi boyunca bütün zaruriy qararlar alınmalı. Ukrainanıñ yañı Anayasasında qırımtatarlarğa idare aqqı, milliy-territorial muhtariyet ve özüni belgilev aqları qayd etilmek kerektir», – denile vesiqada.
Bildirilgeni kibi, Türkiye paytahtı Ankarada avgust 1-2 künleri Bütündünya qırımtatar kongressi keçti. Qırımnıñ Rusiye akimiyetiniñ qırımtatarlarğa nisbeten ayırımları sebebinden forumnı Qırımda keçirip olamadılar. Bundan da ğayrı, yarımadağa kiriş Mustafa Cemilev ve Refat Çubarovğa yasaq etildi. Kongresske Meclis azalarınıñ çoqusı kelip olamadı. Olarnı forumnıñ keçirilüv künü «fevral 26 işi» boyunca sorğuğa çağırdılar.
