Türkiye paytahtı Ankarada II Bütündünya qırımtatar kongressi soñuna yetti. Qırım.Aqiqat mühbiri bildirgeni kibi, forumnı Ukraina ve qırımtatar halqnıñ marşları ile qapattılar.
Bunıñ ile iştirakçiler «Ukrainağa şan-şerefler. Qaramanlarğa şan-şerefler olsun!» kibi şiarlarnı seslendire ediler.
Ukraina prezidentiniñ Vekâletlisi Mustafa Cemilevniñ teklifi ile nevbetteki Kongressni Qırım paytahtı ya da Kiyede keçirmege qarar aldılar.
«Kongressniñ nevbetteki toplaşuvnı qırımtatar halqınıñ Muhtar Cumhuriyetiniñ paytahtı – Aqmescit şeerinde, ya da Ukraina paytahtı Kiyevde keçirmege qarar alındı», – dey Cemilev.
Nevbetteki qurultay dört yıldan soñ keçirilmeli.
Bildirilgeni kibi, Türkiye paytahtı Ankarada avgust 1-2 künleri Bütündünya qırımtatar kongressi keçe. Qırımnıñ Rusiye akimiyetiniñ qırımtatarlarğa nisbeten ayırımları sebebinden forumnı Qırımda keçirip olamadılar. Bundan da ğayrı, yarımadağa kiriş Mustafa Cemilev ve Refat Çubarovğa yasaq etildi. Kongresske Meclis azalarınıñ çoqusı kelip olamadı. Olarnı forumnıñ keçirilüv künü «fevral 26 işi» boyunca sorğuğa çağırdılar.
