Link açıqlığı

Saatnıñ esas haberi

Qırımtatar kongressi halqına muracaat etip, Qırımnı terk etken vatandaşlarını Vatanğa qaytmağa çağıra


Bütündünya qırımtatar kongressi qırımtatar halqına muracaat etip, dünyanıñ angi köşesinde yaşağanına baqmadan, Qırımıñ işğalden azat etilmesi oğrunda, Vatanı, Qırımda öz-özüni belgilev aqqı oğrunda küreşmege çağıra.

Vesiqa Ankarada Kongress toplaşuvında, bazar künü, avgust 2-de, qabul etildi, haber ete Qırım.Aqiqat mühbiri.

Kongres iştirakçileri qırımtatar cemaat teşkilâtlarına, siyasiy ve içtimaiy müessise, milliy matbuat vastalarına ve qırımtatar milliy küreşine qol tutmağa istegenlerni Bütündünya qırımtatar kongressi etrafında birleşmege çağıra.

Muracaatta demokratiya yolu ile saylanılğan Qırımtatar Milliy Qurultayı, Qırımtatar Milliy Meclisi ve Bütündünya qırımtatar kongressine qol tutmaq ve öz faaliyetinde olarnıñ qararlarına riayet etmek çağıruvları bardır.

Bundan da ğayrı, qırımtatarlarnı qırımtatar tili ve milliy degerlerniñ saqlanıluvına ve canlandırılmasına, zemaneviy til ve medeniy müessiselerniñ teşkil etilmesine qoşulmaq, özara ve ailelerde ana tilinde laf etmege rica eteler.

Kongress vekilleri yarımadanı işğalden sebep terk etken qırımtatarlarnı Vatanı – Qırımğa qaytmağa çağıralar.

Bildirilgeni kibi, Türkiye paytahtı Ankarada avgust 1-2 künleri Bütündünya qırımtatar kongressi keçe. Qırımnıñ Rusiye akimiyetiniñ qırımtatarlarğa nisbeten ayırımları sebebinden forumnı Qırımda keçirip olamadılar. Bundan da ğayrı, yarımadağa kiriş Mustafa Cemilev ve Refat Çubarovğa yasaq etildi. Kongresske Meclis azalarınıñ çoqusı kelip olamadı. Olarnı forumnıñ keçirilüv künü «fevral 26 işi» boyunca sorğuğa çağırdılar.

XS
SM
MD
LG