Link açıqlığı

Bütündünya qırımtatar kongressi Rusiye Federatsiyasınıñ Qırımda yaşağan qırımtatarlarğa nisbeten cinayetleri boyunca delillerni toplay.

Bu aqta Kongressniñ dünya toplulığına, BMT, insan aqlarını, demokratiyanı, millet ve devletler tarafından teşkil etilgen birliklerni, milletlerara ve milliy institutlarnı ürmet etken dünya devletlerine muracaatında aytıla, haber ete Qırım.Aqiqat mühbiri. Muracaat bazar künü, avgust 1-de, qabul etildi.

«Rusiye Federatsiyasınıñ 2014 senesi fevral 28 künü, bütün halqara vesiqalarnıñ, şu cümleden BMT Beyannamesi, 1994 senesi Budapeşt memorandumı, İnsan aqları boyunca Umumiy Beyanname ve İnsan aqları boyunca Avropa konventsiyasınıñ bozuluvı ile yapılğan Qırımnıñ işğalini canavarlıq olaraq tanıp, Bütündünya qırımtatar kongressi işğalci ve yardımcıları üzerinde mahkemelerge yollanılacaq delillerniñ toplanılması aqta ilân ete», – denile vesiqada.

Böyleliknen, qayd etile muracaatta, qırımtatarlarğa nisbeten 2,5 asır devamında insaniyetlikke qarşı cinayetlerni yapqanlar bugün aynı cinaiy maqsatlarnıñ peşindedir. Şu cümleden, yarımadanıñ işğalinden başlap ve bugünge qadar, 1,5 yıl devamında, 20-den ziyade qırımtatarı ğayıp oldı, üçü azap neticesinde öldürildi.

Bundan da ğayrı, öz qarşılığını demokratik usulları ile bildirgen yüzlerce qırımtatarı qanunsız sürette yaqalanıldı, olarnı para cezaları ile qorquzmağa tırıştılar, evlerde qanunsız tintüvler keçirile. Qanunsızlıqnıñ daa bir nümünesi – yarımada işğaline qarşı çıqqan Meclis reisiniñ muavini Ahtem Çiygoznıñ apiste bulunuvıdır.

Bildirilgeni kibi, Türkiye paytahtı Ankarada avgust 1-2 künleri Bütündünya qırımtatar kongressi keçe. Qırımnıñ Rusiye akimiyetiniñ qırımtatarlarğa nisbeten ayırımları sebebinden forumnı Qırımda keçirip olamadılar. Bundan da ğayrı, yarımadağa kiriş Mustafa Cemilev ve Refat Çubarovğa yasaq etildi. Kongresske Meclis azalarınıñ çoqusı kelip olamadı. Olarnı forumnıñ keçirilüv künü «fevral 26 işi» boyunca sorğuğa çağırdılar.

XS
SM
MD
LG