Türkiye içün Ukrainanıñ buhraniy vaziyetinde birinci yerde qırımtatarlarnıñ raatlığı, amanlığı ve havfsızlığı tura, dey memleket prezidenti Recep Tayip Erdoğan.
«Bugün olğanı kibi, kelecekte de yardımımızğa işana bilesiñiz. Eminim, qırımtatar halqınıñ birleşüvi şaraitlerinde, sulh ve havfsızlıq negizinde keçken Bütündünya kongressi küreşiñizni arttırır», – dep muracaat etti Bütündünya qırımtatar kongressi iştirakçilerine Türkiye prezidenti, haber ete Meclisniñ matbuat hızmeti.
Onıñ sözlerine köre, Türkiye Qırım işğalini tanımay ve tanımaz.
Erdoğan dey ki, qırımtatar halqına nisbeten olğan ayırım ve zulumlarnı yoq etmek içün Türkiye Cumhuriyeti taraflar ile subet keçire, zaruriy teklif ve adımlarnı ete.
Öz nevbetinde Türkiye baş naziri Ahmet Davutoğlu Kongress vekillerine yazğan muracaatında qırımtatar halqınıñ bütün sınavlarına 2014 senesi qanunsız referendumı ve soñraki Qırımnıñ qanunsız işğali da qoşulğanını qayd ete.
«Biz bu mevzuğa halqara toplulıqnıñ diqqatını celp etmege tırışacaqmız. Ümüt etem ki, bu Kongressniñ sayesinde qırımtatarlarnıñ sesi bütün dünyada eşitilir», – qayd etti Türkiye baş naziri.
Türkiye Tış işler naziri Mevlüt Çavuşoğlu Kongresske muracaat etip, bu zor devirniñ eñ yaqın zamanda bitmesi içün şimdilik areket alıp barılğanını qayd etti.
O şunı da qoştı ki, Türkiye Cumhuriyeti Qırım vaziyetini nezaret etmege ve yarımadada ayırımlarğa qarşılığını bildirmege devam etecek.
Bildirilgeni kibi, Türkiye paytahtı Ankarada avgust 1-2 künleri Bütündünya qırımtatar kongressi keçe. Qırımnıñ Rusiye akimiyetiniñ qırımtatarlarğa nisbeten ayırımları sebebinden forumnı Qırımda keçirip olamadılar.
