Qırımda avgust 1 künü Qırımtatar Milliy Meclisiniñ birden üç azasını Rusiye mahsus hızmetleri sorğuğa çağırdılar. Qırım boyunca Rusiye Taqikat komitetine Qırımtatar Milliy Meclisi reisiniñ birinci muavini Nariman Celâl, Meclis reisiniñ muavini İlmi Ümerov, Qırımtatar Milliy Qurultayınıñ Merkeziy saylav komissiyasınıñ başı Zair Smedlâyev çağırıldı, – haber ete Qırım.Aqiqat.
Sorğudan soñ Ümerov, Smedlâyev ve Celâlnı yolladılar, başqa celpname berilmedi. Bu aqta Facebookta Meclis reisiniñ muavini İlmi Ümerov bildirdi.
«Men, Nariman, Zair sorğulardan çıqtıq. Başqa celpname berilmedi – Kongress başlandı da. Oğurlı yollar», – yazdı Ümerov.
Mecliste deyler ki, bu kibi sıq sürette keçirilgen sorğularnıñ maqsadı – 2015 senesi avgust 1-2 künleri Ankarada keçirilgen II Bütündünya qırımtatar kongressinde iştirak etüvlerine keder etmektir.
Rusiye yarımadanı işğal etken soñ 2014 senesi fevral 27-den bugünki künge qadar 15 biñ qırımtatarı Qırımnı terk etmege mecbur oldı. Qırımtatar halqı liderleriniñ Qırımğa kirişleri yasaq etildi, demokratik yollar vastasınen saylanğan ve bütün dünyada yerli halqlarnıñ idare organlarınıñ örnegi olğan – Qırımtatar Milliy Qurultayı ve Meclisi – faaliyetlerini devam ettirmek imkânından marum qaldılar, olarnıñ mal-mülki ise musadere etildi.
İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.
