Rusiye akimiyeti qırımtatarlardan olarnıñ öz vatanı – Qırımnı terk etmesini istey. Bu kibi bildirüvni Ankarada keçirilgen Bütündünya qırımtatar kongressinde çıqışta bulunıp, Ankara Bilkent universitetiniñ professorı Hakan Kırımlı seslendirdi, – haber ete Ankaradan Qırım.Aqiqat mühbiri.
«İşğal – halqara uquqnıñ canavar ve qaba bozuluvıdır. Rusiye akimiyeti qırımlılar bizni davet etti, dey, amma bu yalan. Biz, qırımtatarlar, bu kerçekten yalan olğanını kösterdik. Bunen razı olğanımız içün bizni qorquzmağa tırışalar», – dedi Kırımlı Kongresste çıqışta bulunıp.
Onıñ sözlerine köre, Rusiye akimiyeti qırımtatarlar «öz Vatanını terk etkenini, Qırımnı terk etkenini» istey. «Qalğanlar ise – ruslaştırılğan insanlar, olar akimiyetke boy egerler».
«Putinniñ maqsadını bilmege isteseñiz, bugün tilini coyğan bir qaç yüz qarayğa baqıñız. Ekinci variant – Tataristan. Belki, camilerni qurarlar, festival teşkil eterler, biri qırımtatar qalpağı ile çıqar, ve, belki, «Haytarmanı» töşer, amma bu saçmalıqtır», – dey Kırımlı.
O, Türkiye, Qırımda ve diger regionlarda «yalanğa inanğan insanlar bar olğanından» yazıqsınuvını bildirdi.
«Tatarlardan bazılarını vitrina kibi köstereler, amma bir şey deñişmez. Biz – qırımtatarlar – iç bir vaqıt bunen razı olmamız. Qırımtatarlar iç bir vaqıt teslim olunmay», – dep bitirdi öz çıqışını Kırımlı.
Kongress vekilleri onıñ sözlerini el çırpmalar ile qarşıladılar.
Rusiye yarımadanı işğal etken soñ 2014 senesi fevral 27-den bugünki künge qadar 15 biñ qırımtatarı Qırımnı terk etmege mecbur oldı. Qırımtatar halqı liderleriniñ Qırımğa kirişleri yasaq etildi, demokratik yollar vastasınen saylanğan ve bütün dünyada yerli halqlarnıñ idare organlarınıñ örnegi olğan – Qırımtatar Milliy Qurultayı ve Meclisi – faaliyetlerini devam ettirmek imkânından marum qaldılar, olarnıñ mal-mülki ise musadere etildi.
İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.
