Qırımtatar Milliy Qurultayınıñ Teftiş komissiyasınıñ reisi Ali Özenbaş II Bütündünya qırımtatar kongressi devamında «qırımtatarlar» yerinde «qırımlı» ismini qullanmağa teklifi ile buyurdı.
«Er bir halqnıñ adı bar. Bizde o yoq. Toprağımızda saip olmağa istesek, qırımlı olmalımız», – dep añlattı Özenbaş Ankarada keçken II Bütündünya qırımtatar kongressinde çıqışta bulunıp.
Vekiller işbu teklifke qol tutmadı, – dep bildire Ankaradan Qırım.Aqiqat mühbiri. Evel Ali Özenbaş defalarca bu ğayeni bildirgen eldi, amma o alâ daa çezilmegen qala.
Rusiye yarımadanı işğal etken soñ 2014 senesi fevral 27-den bugünki künge qadar 15 biñ qırımtatarı Qırımnı terk etmege mecbur oldı. Qırımtatar halqı liderleriniñ Qırımğa kirişleri yasaq etildi, demokratik yollar vastasınen saylanğan ve bütün dünyada yerli halqlarnıñ idare organlarınıñ örnegi olğan – Qırımtatar Milliy Qurultayı ve Meclisi – faaliyetlerini devam ettirmek imkânından marum qaldılar, olarnıñ mal-mülki ise musadere etildi.
İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.
