Link açıqlığı

Ankarada cumaertesi künü avgust 1-de üyle teneffüsinden soñ II Bütündünya qırımtatar kongressi işine devam etti, – dey Qırım.Aqiqat mühbiri.

Kongress prezidenti Refat Çubarov toplaşuvda 4 memleketten 430 vekil iştirak etkenini bildirdi, olarnıñ arasında: Ukraina, Türkiye, Özbekistan, Qazahistan, Qırğızistan, Litvaniya, Romaniya, Poloniya, Frenkistan, Rusiye, AQŞ ve Kanada.

Çubarov Kongressniñ prezidium ve kâtibiyetini saylamağa teklif etti. Rey berüvden soñ prezidium terkibine Ayla Bakallı, Mükremin Şahin, Ali Özenbaş ve digerleri kirdi.

Kâtibiyet erkânına Eskender Bariyev, Gayana Yüksel, Deniz Çongar, Ömer Özel i Samet Mennan kirdiler.

Vekiller iştirakçilerniñ çıqışlarına beşer daqqa ayırdılar.

Rusiye yarımadanı işğal etken soñ 2014 senesi fevral 27-den bugünki künge qadar 15 biñ qırımtatarı Qırımnı terk etmege mecbur oldı. Qırımtatar halqı liderleriniñ Qırımğa kirişleri yasaq etildi, demokratik yollar vastasınen saylanğan ve bütün dünyada yerli halqlarnıñ idare organlarınıñ örnegi olğan – Qırımtatar Milliy Qurultayı ve Meclisi – faaliyetlerini devam ettirmek imkânından marum qaldılar, olarnıñ mal-mülki ise musadere etildi.

İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.

XS
SM
MD
LG