Ukraina Tış işler naziri Pavlo Klimkin avgust 1 künü Ankarada keçiriligen II Bütündünya qırımtatar kongressinde iştirak ete. Qırım.Aqiqat mühbiri bildirgeni kibi, Klimkin Türkiye baş nazir muavini Numan Kurtulmuş ve qırımtatarlarnıñ yetekçisi Mustafa Cemilev ile prezidiumda buluna.
Ukraina Tış işler naziri Pavlo Klimkin II Bütündünya qırımtatar kongressi iştirakçilerine Ukraina prezidenti Petro Poroşenko adından muracaatnı oqudı. Qırım.Aqiqat mühbiri bildirgeni kibi, Klimkinniñ nutqunı bir qaç kere el çırpmalar ile böldiler.
«Ekinci kongress işğal şaraitlerinde keçe, amma Ukraina iç bir vaqıt Qırım tamır halqınıñ aqlarınıñ, tuvğan toprağında yaşamaq aqqınıñ bozuluvına boyun egmez. Ukraina Qırımğa ukrain akimiyetiniñ, milliy yetekçiler Mustafa Cemilev ve Refat Çubarovnıñ Qırımğa qaytuvı oğrunda küreşe. Planlarımızda – qırımtatarlarğa muhtariyetniñ berilmesi, tarihiy adaletlikniñ ğayrıdan tiklenilmesi aqqında yol haritasınıñ işlep çıqarılmasıdır», – denile Poroşenkonıñ muracaatında.
Bunıñ ile Klimkin Poroşenko adından Türkiyege onıñ Ukrainağa qol tutuvı sebebinden minnetdarlığını bildirdi, qırımtatar halqına tınçlıq, birlikni bağışladı.
«Sabıq akimiyet qırımtatarlarğa işanmağanı, kerekli seviyede qol tutmağanı içün afu soramağa isteyim. Qırım Ukrainasız olamaz, Ukraina ise Qırımsız, bu aqiqattır. Ukraina işğalge iç bir vaqıt boyun egmez. Aqiqat şunda ki, Qırım kene Ukrainağa qaytır», – dedi Pavlo Klimkin.
Qırım.Aqiqat mühbiriniñ aytqanı kibi, Pavlo Klimkinniñ çıqışı bitkeninden soñ kongress iştirakçileri: «Ukrainağa şan-şerefler olsun!» dep qıçırmağa başladılar.
Kongresste 12 memleketten 500 vekilniñ iştirak etmesi beklenile: Ukraina, Türkiye, Özbekistan, Qazahistan, Qırğızistan, Litvaniya, Romaniya, Poloniya, Frenkistan, Rusiye, AQŞ ve Kanada.
Rusiye yarımadanı işğal etken soñ 2014 senesi fevral 27-den bugünki künge qadar 15 biñ qırımtatarı Qırımnı terk etmege mecbur oldı. Qırımtatar halqı liderleriniñ Qırımğa kirişleri yasaq etildi, demokratik yollar vastasınen saylanğan ve bütün dünyada yerli halqlarnıñ idare organlarınıñ örnegi olğan – Qırımtatar Milliy Qurultayı ve Meclisi – faaliyetlerini devam ettirmek imkânından marum qaldılar, olarnıñ mal-mülki ise musadere etildi.
İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.
