Link açıqlığı

Bütündünya kongressiniñ vekilleri Ankarağa kele. Aqşam Cemilevni bekleyler


Ankarağa II Bütündünya qırımtatar kongressi vekilleri kelmekte. Kongress avgust 1-de işke başlaycaq. Tedbirde 12 memleketten 500 vekilniñ iştiraki beklenile, şu cümleden Ukraina, Türkiye, Özbekistan, Poloniya, Frenkistan, Rusiye, AQŞ, Kanada. Vekillerniñ esas qısmı iyül 31 künü Kiyevden uçaq ile keldi.

Ankaradan Qırım.Aqiqat mühbiri bildirgeni kibi, saat 15:30 eki kün devamında Bütündünya qırımtatar kongressi keçirilecek Bilkent musafirhanesine Ukraina eyyeti keldi. Olar Ankarağa Kiyevden uçaq vastası ile kelgenler.

Kelgen vekiller arasında – Kongressniñ şimdiki prezidenti, Qırımtatar Milliy Meclisiniñ reisi Refat Çubarov, muavini Aslan Ömer Qırımlı, Meclis azaları: Eksender Bariyev, Gayyana Yüksel, Gülnara Bekirova, Qırımtatar Milliy Qurultayınıñ Teftiş komissiyasınıñ reisi Ali Özenbaş, Meclis reisiniñ Türkiye boyunca keñeşçisi İsmet Yüksel, ATR mediaholdinginiñ başı Lenur İslâmov, qırımtatar cemaat teşkilâtlarınıñ temsilcileri, faaller, medeniyet erbapları, Qırım, ukrain matbuat vastalarınıñ jurnalistleri.

Aqşamğa yaqın Ankarağa qırımtatar halqınıñ yetekçisi, Ukraina prezidentiniñ qırımtatarlarnıñ işlerinden vekâletlisi. Ukraina halq deputatı Mustafa Cemilevniñ kelmesi beklenile.

Kongresske dünyanıñ 12 memleketinden 180 qırımtatar teşkilâtı arizalarını yolladı.

Kongresste iştirak etecek teşkilâtlar avgust 1-2 künleri Bilkent Hotel salonında toplanıp, Qırımnıñ qanunsız işğali ve qırımtatarlarnı yoq etüv havfı şaraitlerinde yapılacaq areketlerni muzakere etecekler.

Forumda Kongress prezidenti saylanılacaq. Al-azırda o – 2009 senesi Aqmescitte I Bütündünya qırımtatar kongressi vaqtında saylanılağan Qırımtatar Milliy Meclis reisi Refat Çubarovdır.

İştirakçilerge berilgen kongress malümatında şunı qayd eteler ki, Sovet Birliginiñ dağıluvından soñ Vatanına qaytqan 350 biñ qırımtatarı bugün kene basqı ve yoq oluv havfına rastkeldi.

Rusiye yarımadanı işğal etkeninden soñ, 2014 senesi fevral 27 kününden ve bugüngece, 15 biñ qırımtatarı Qırımnı terk etmege mecbur oldı. Bunıñ ile qırımtatar halqınıñ yetekçilerine Qırım kirişi yasaqlandı, qanuniy sürette saylanılağan ve bütün dünyada tamır halqlarınıñ öz-özüni idare etüv organlarınıñ nümünesi olğan Qırımtatar Milliy Qurultayı ve Qırımtatar Milliy Meclisi işine devam etmek imkâniyetinden marum qaldılar.

İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.

Rusiye akimiyeti Kongressniñ keçirilmesinde telüke kördi. Onı yasaq etip olamayıp, Qırımda Rusiye mahsus hızmetleri er kün qırımtatar faallerini «fevral 26» işi boyunca sorğuğa çağıralar. Olarğa yarımada tışına çıqmağa yasaq, şunıñ içün olar forum vekillerine video muracaatını yazdılar.

XS
SM
MD
LG