Link açıqlığı

Ankaradaki Kongressniñ Rusiye vekili: qırımtatarlarğa muhtariyet berilmeli


Ankaradaki II Bütündünya qırımtatar kongressine kelgen Moskva Qırımtatar cemiyeti idaresiniñ reisi Erik Kudusov Rusiye akimiyetine qırımtatar muhtariyetiniñ zaruriyeti aqta bildirecek ola.

Qırım.Aqiqatqa bergen izaatında o, Kongressten Rusiyege qaytıp kelgeninde «qırımtatarlarnıñ aqlavı aqqında» aytacağını bildirdi. «Yani, qırımtatarlarnıñ muhtariyeti olmalı. Ayırım usulları ile meni yeñip olamadılar. Olar (Rusiye akimiyeti. – QA) meni diñlemege mecbur olacaqlar. Putinden areket etecek olam», – dey o.

​Bütündünya qırımtatar kongressiniñ prezidenti kim olmaq kerek degen sualge Kudusuv dey ki, 2009 senesi o, bu vazifege Refat Çubarovnıñ saylanılmasına qarşı çıqqan edi eken. «Bu vaqıt içerisinde o deñişti ve onıñ yerini alacaq başqa namzetni bilmeyim», – dey o.

II Bütündünya qırımtatar kongressi Ankarada (Türkiye) avgust 1-2 künleri keçirilecek. Forum vekilleri Ankarağa cuma künü, iyül 31-de, kele.

Rusiye yarımadanı işğal etkeninden soñ, 2014 senesi fevral 27 kününden ve bugüngece, 15 biñ qırımtatarı Qırımnı terk etmege mecbur oldı. Bunıñ ile qırımtatar halqınıñ yetekçilerine Qırım kirişi yasaqlandı, qanuniy sürette saylanılağan ve bütün dünyada tamır halqlarınıñ öz-özüni idare etüv organlarınıñ nümünesi olğan Qırımtatar Milliy Qurultayı ve Qırımtatar Milliy Meclisi işine devam etmek imkâniyetinden marum qaldılar.

İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.

XS
SM
MD
LG