Qırımtatar Milliy Meclisi azalarınıñ Rusiye mahsus hızmetleri tarafından sorğuları Ankarada II Bütündünya qırımtatar kongressiniñ azırlıq ve keçirüv künlerine kele. Meclisniñ matbuat hızmeti bildirgeni kibi, sorğular er kün keçirile.
Böyleliknen, 2015 senesi iyül 29 künü Qırım boyunca Taqiqat komitetinde «fevral 26» işi boyunca Aqmescit regional meclisiniñ reisi Lenmar Yunusov sorğuğa çekildi. Nevbetteki sorğunı 2015 senesi avgust 1-de keçirecekler.
Evel, iyül 28 künü «fevral 26» işi boyunca Taqiqat komitetine Qırımtatar Milliy Meclisi reisiniñ birinci muavini Nariman Celâl, Meclis reisiniñ muavini İlmi Ümerov, Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev davet etilgen edi.
«Celâl, Smedlâyev ve Yunusovğa 2015 senesi avgust 1-ne celpname berildi. Milliy Meclis reisiniñ muavini İlmi Ümerovğa iyül 20 künü keçirilgen sorğudan soñ nevbetteki «körüşüvni» taqiqatçılar iyül 31 kününe belgilediler», – denile beyanatta.
Mecliste böyle sıq sürette keçirilgen sorğularnı – 2015 senesi avgust 1-2 künleri Ankarada keçirilecek II Bütündünya qırımtatar kongressine çıquv maniası olaraq tanıylar.
Rusiye yarımadanı işğal etkeninden soñ, 2014 senesi fevral 27 kününden ve bugüngece, 15 biñ qırımtatarı Qırımnı terk etmege mecbur oldı. Bunıñ ile qırımtatar halqınıñ yetekçilerine Qırım kirişi yasaqlandı, qanuniy sürette saylanılağan ve bütün dünyada tamır halqlarınıñ öz-özüni idare etüv organlarınıñ nümünesi olğan Qırımtatar Milliy Qurultayı ve Qırımtatar Milliy Meclisi işine devam etmek imkâniyetinden marum qaldılar.
İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.
