Link açıqlığı

Rusiye Bütündünya qırımtatar kongressiniñ vekillerine basqı ete – Ukraina Tış işler nazirligi


Ukraina Tış işler nazirligi 2015 senesi avgust 1-2 künleri Ankarada keçirilecek II Bütündünya qırımtatar kongressinde qırımtatar halqı temsilcileriniñ iştirak etüvine suniy yaratılğan manialarğa öz qarşılığını bildire.

Bu aqta nazirlik saytında aşkâr etilgen bildirüvde aytıla.

«Rusiye akimiyeti aqsızlıq ve ayırımlar müitini yaratıp, QMC yaşağan kongress vekillerine siyasiy basqı ete ve olarnıñ işbu tedbirde iştirak etüvine imkân bermemek içün, olarğa yarımadadan çıqmaga keder etecek ola», – denile beyanatta.

Nazirlikte «insan aqları, halqara qaidelerniñ bozuluvına ve insaniyetlik degerleriniñ ihmalına» diqqat eteler.

Ukraina Tış işler nazirligi şunı qayd ete ki, kongresste Qırımdan qırımtatar faalleriniñ iştirak etmemesi «Rusiye tarafından qanunsız areketlerniñ etilgenini ve razı olmağanlarğa qarşı terror qullanuvını kene bir kere tasdiqlar».

«Rusiye akimiyetiniñ qırımtatar areketi faalleriniñ söz ve areket etüv serbestligini sıñırlamaq ıntıluvlarını takbih etemiz. İşğal etilgen Qırım yarımadasında insan aqlarına riayet etilmesini, şu cümleden, II Bütündünya qırımtatar kongressinde iştirak etecek Qırım temsilcileri ögündeki manialarnı yoq etmege talap etemiz», – denile beyanatta.

Evel bildirilgeni kibi, Ankarada (Türkiye) II Bütündünya qırımtatar kongressinde iştirakçiler Qırım işğali şaraitlerinde yapılacaq areketlerni muzakere etecekler.

İyül 28 künü Qırımda Rusiye Taqiqat komitetiniñ idaresi Ankarada Bütündünya qırımtatar kongressiniñ keçirilmesi vaqtında Qırımtatar Milliy Meclisi reisiniñ birinci muavini Nariman Celâl, Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyevge Qırımdan çıqmağa yasaq etti.

XS
SM
MD
LG