Link açıqlığı

İtalyan deputatları oktâbr ayında Qırımğa kelecek ola


İtaliya Milliy parlamentiniñ deputatları 2015 senesi oktâbr ayında işğal etilgen Qırımğa kelecek olalar, dedi ziyaretniñ teşebbüsçilerinden biri, «Beş yıldız» muhalif firqasınıñ temsilcisi Manlio di Stefano.

«İtalyanlarnıñ menfaatını tüşünip, oktâbr ayında biz ükümet yapıp olamağan şeylerni yapmaq içün Rusiye ve Qırımğa baracaqmız», – yazdı o Facebookta.

Deputat ANSA italyan neşirine aytqanı kibi, onıñ siyasiy küçü Rusiyege nisbeten sanktsiyalarğa qarşı çıqa, olarnı «çılğınlıq» olaraq adlandıra ve olarnıñ italyanlarnıñ menfaatına ters kelgenini tüşüne.

Manlio di Stefano Rusiye akimiyeti temsilcileri ile körüşüvge ümüdini bildirdi.

Evel Qırımğa bir qaç Frenkistan deputatı kelgen edi. Ziyaret resmiy degil edi. Frenkistan Tış işler nazirliginde bu ziyaretni halqara uquqnıñ bozuluvı olaraq adladı ve tenqit ettiler.

Ukraina Tış işler nazirligi Ukraina Havfsızlıq hızmetine (SBU) keçken afta Qırımnı, ukrain tarafınıñ izni olmadan, ziyaret etken frenk deputatlarına memleket kirişini yasaq etmek ricası ile mektüp yolladı.

XS
SM
MD
LG