Link açıqlığı

Qırımtatar Milliy Meclisiniñ reisi muavini Ahtem Çiygoznıñ imayesi Aqmescitniñ Kiyev rayon mahkemesiniñ apis müddetiniñ uzatuvı aqta qararına itiraz bildirmek niyetindedir.

Bu aqta Qırım.Aqiqat mühbirine Çiygoznıñ advokatı Aleksandr Lesovoy bildirdi.

«İnsan aqları aqqında Avropa beyannamesiniñ qaidelerine köre, taqiq etilgen vaqialardan bir buçuq yıl keçkeninden soñ, Çiygoznı apiste tutmaq içün acet yoq olğanını tüşünem. Em de fevral 26 künü adiselerinden soñ Çiygoz taqiqatqa keder etecek bir şey yapmadı ki», – dey Lesovoy.

Onıñ sözlerine köre, o mahkeme qararına şikâyetni daa bermedi, amma bunı üç kün içinde yapacaq ola.

Aqmescitniñ Kiyev rayon mahkemesi iyül 28 künü Çiygoznı 2015 senesi noyabr 19-na qadar apiste qaldırdı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

XS
SM
MD
LG