«Çetel işler maydanı» teşkilâtınıñ idare reisi, Ukrainanıñ İstanbulda sabıq baş konsulı Bogdan Yaremenko Türkiyede «Ukraina ve qırımtatarlarnıñ tarafına müsbet deñişüvler» olayatqanını tüşüne.
Bu aqta o «Gromadske radіo»ğa bildirdi.
Onıñ sözlerine köre, Türkiyeniñ resmiy mevamı NATO memleketleriniñ resmiy mevamından pek farq etmey. O işğalni takbih ete ve tanımay. Amma, Avropa Birligi memleketlerine köre, Türkiye Rusiyege qarşı sanktsiyalarnı kirsetmey, aksine ticariy işbirlikni keñişletmek içün fırsattan faydalana, dey ekspert.
«Qırımtatar azlıqlarınıñ vaziyeti boyunca mevamı eki manalı edi. Mında da, ğaliba, Ukraina ve qırımtatarlarnıñ tarafına müsbet deñişüvler yüz bere», – dedi o.
Bunıñ ile Yaremenko şunı da qayd etti ki, Ukrainanıñ bugün Türkiyede olayatqan adiselerge («İslâm devleti» ve kürdler ile mucadele – Qırım.Aqiqat) munasebeti daa da açıq-aydın olmalıdır.
«Soñ zamanları öyle teessurat peyda ola ki, sanki Ukraina tış siyaseti ekspert, jurnalistlerniñ merağı oldı, amma tek devletniñ degil. Bu vaqiağa Ukraina reaktsiyasını körmeymiz. Ukraina adet üzre itibar, nezaket, duyğudaşlıqnı körmemezlikke urıp, özüne hususiy munasebet talap ete. Dostlarımızğa diqqatlıca olmalımız. Em de, Türkiye resmiy strategik şerik ola, amma, dostluq munasebetlerine baqmadan, ukrain tış siyaseti içün mahsus çağıruvlarnı meydanğa ketire», – dey o.
İyül 24 kününden Türkiye Suriyede «İslâm devleti» ve İraq şarqında kürdlerniñ mevzilerine ücüm etmektedir. Bunıñ ile, malüm olğanı kibi, bu afta Türkiye politsiyası «İslâm devleti» teşkilâtı ile bağı olğan bir 15 insannı ve «Kürdistannnı iş firqası» ile bağı olğan 19 insannı yaqaladı.
