Ukraina Tış işler naziri dey ki, 2014 senesi mart ayında Rusiye tarafından işğal etilgen Qırımnıñ şimdiki statusı yaqın zamanda deñişir.
Bu aqta o The New Times neşirine bildirdi.
«Rusiye avasız bir boşluqta degildir – seyyaremizdedir, mında mahkeme qararlarınıñ amelge keçirilüv mehanizmleri çalışa. Qırım boyunca da aynı öyle olur. Kimse bundan qaçamaz. Şimdi Qırımda olayatqan adiselerge baqsaq – insan aqlarınıñ bozuluvı, kütleviy matbuat vastalarınıñ yoqlavı, qaparcılıqnıñ artması – yarımada belgisizlikke kete. Onıñ içün eminim ki, kelecekte Qırımnıñ şimdiki statusı iç te saqlanılmaz. Em de men çoqqa sürecek istiqbal aqqında aytmayım, yaqın zamanda olacaq istiqbal», – dey Klimkin.
Onıñ sözlerine köre. «Donbassta melez cenki ketkende, Qırımnıñ muvaqqat işğali saqlanılğanda» ukrain-rus munasebetleriniñ bir tertipke ketirilecegi aqqında söz yürütmege acet bile yoq.
2015 senesi iyül ayında Rusiye Tış işler naziri Sergey Lavrov Qırımnıñ Rusiyege ait olması aqta halqara seviyede qapalı olğanını bildirdi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
