Link açıqlığı

Qırımda Meclis reisiniñ yaqalanğan muavini: meni ailemden ayırdılar, amma Vatanımnı men terk etmem


İyül 28 künü Qırım mahkemesi noyabr 19-na qadar apiste qaldırğan Qırımtatar Milliy Meclisi reisiniñ muavini Ahtem Çiygoz öz çıqışı vaqtında «tuvğanları ve yaqınlarından ayırılğanını» qayd etti. Amma, cinaiy taqipke baqmadan, Qırımnı terk etmeycegini bildirdi.

Çiygoz çıqışını Qırımtatar Milliy Meclisiniñ matbuat hızmeti aşkâr etti.

«Meni yaqalamadılar, etraf müitten ayırdılar. Yarım yıl devamında oğul, ana-baba, tuvğan ve yaqınlarımnı körip olamayım», – dey o.

«Menim mında (Qırımda – muar.) ailem, balalarım, esli başlı ana-babam yaşay. Hatırlatam, babam 78 yaşında, anam – 74. Kene yat yerlerge ketmek içün Vatanımızğa qaytmadıq, şunıñ içün Vatanımnı terk etmege istegim yoq. <…> Yaşamağa ya da ölmege qısmetim olsa, Vatanımda olur», – dey Çiygoz.

Qırım.Aqiqat bildirgeni kibi, Ahtem Çiygoz iyül 28 künü keçirilgen mahkeme toplaşuvında oña qarşı iş «siyasiy sımarış» olğanını bildirdi.

Meclis reisiniñ birinci muavini Nariman Celâlnıñ sözlerine köre, Ahtem Çiygoznıñ apis müddetiniñ uzattıruvında taqiqatnıñ esas delillerinden biri – onıñ qırımtatar halqınıñ yetekçileri Mustafa Cemilev ve Refat Çubarov ile daima tutqan bağı ola.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

XS
SM
MD
LG