Aqmescitniñ Kiyev rayon mahkemesinde salı künü Rusiye Federatsiyasınıñ Taqiqat komiteti taqiqatçısınıñ Qırımtatar Milliy Meclisi reisiniñ muavini Ahtem Çiygoznıñ apis müddetini uzatmaq aqqında şefaatı boyunca toplaşuv keçti.
Meclisniñ matbuat hızmeti bildirgeni kibi, adliyeciniñ delillerine baqmadan, mahkeme kene de Çiygoznı üç ay ve 21 künge, yani 2015 senesi noyabr 19-na qadar apiste qaldırmağa qarar aldı.
Ahtem Çiygozğa qol tutmağa kelgen tuvğanları, dost ve zenaatdaşları aytqanı kibi, onıñ çırayı yoq, azğandır, amma tendiristtir. Bulunuv şaraitlerine şikâyet etmedi. Advokatnıñ aytqanı kibi, salı künü müşterisi mahkemege alıp barılacağını beklep, sabalıq, üyle yemegini aşamaq ve elini-betini yuvmaq imkânından marum qaldı.
«Bugün Ahtem Çiygoznıñ apiste bulunuvınıñ siyasiy sebebi olğanını kene bir kere añladıq. Prokuratura temsilcisi kene de Çiygoznıñ qabaatı isbatlanılğanı aqta ayta edi, faqat işi boyunca mahkeme daa olmağan edi»,– dedi Meclis reisiniñ birinci muavini Nariman Celâl.
Onıñ sözlerine köre, Ahtem Çiygoznıñ apis müddetiniñ uzattıruvında taqiqatnıñ esas delillerinden biri – onıñ qırımtatar halqınıñ yetekçileri Mustafa Cemilev ve Refat Çubarov ile daima tutqan bağı ola.
«Bu açıq-aydın siyaset, meşur qırımtatar siyasetçilerinden birini etraf müitten ayırıp, bu bağnı üzmek içün ıntıluv olmasa, daa nedir», – dey Celâl.
Çiygoznıñ özü mahkemede aytqanı kibi, halqı nice meşaqatlardan keçip, Qırımğa, onı terk etmek içün kelmegen ve onıñ da öyle niyeti yoq. «Bugün siyasiy sımarış aqqında söz ketkende, açıq mahkemege inanmağa acet yoq», – dep yekün çekti Çiygoz.
Mahkemeniñ Ahtem Çiygozğa apis müddetiniñ uzattırılması aqta qararını onıñ yaqınları «Masqaralıq!» dep qarşıladılar.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
