Rusiye tarafından işğal etilgen Qırımda qırımtatarlarnıñ vaziyeti milliy azlıqlar aqları saasında eñ kergin mesele olıp qalmaqta.
Bu aqta Ukraina 2015 senesi yanvar – iyün ayları devamında milliy azlıqlarnıñ aqarını nezareti boyunca teşkerüv gruppası tarafından azırlanılğan maruzada aytıla.
«Mustaqil milliy areketiniñ, qırımtatar matbuat vastalarınıñ ve diger institutlarınıñ yoq etilmesine yönelgen tedbirler, tınç toplaşuvlarnıñ keçirilmesine yasaqlar ve işğalci akimetniñ diger areketleri daimiy ola ve aselet yapılğan bir siyaset olaraq baqıla bile», – denile maruzada.
Vesiqada şunı qayd eteler ki, aynı zamanda, «fevral 26» işi ile bağlı olğan siyasiy taqipler maşinası işlenile. Böylece, Qırımtatar Milliy Meclisi tarafından işğalden evel Qırım Muhtar Cumhuriyetiniñ Yuqarı Şurası binasınıñ Rusiye küçleri tarafından zaptınıñ ögüni almaq maqsadınen keçirilgen mitingni Rusiye akimiyeti «kütleviy nizamsızlıq» olaraq tanıy.
«Bu iş qorquzuv ve miqyaslı ayırımlarğa sebep oldı. Yarımada boyunca tintüv ve yaqalanuvlar keçirile, qırımtatarlarnıñ ğayıp olması qayd etile, işğalci akimiyet bularnı taqiq etmey», – denile iyül 28 künü aşkâr etilgen maruzada.
Milliy azlıqlarnıñ aqlarını nezaret etken gruppa Ukraina milliy cemiyetler kongressiniñ teşebbüsi ile 2014 senesi aprelde teşkil etildi.
