Link açıqlığı

Keriçte XIX asırğa ait Cuma camisini ğayrıdan quralar


Keriçte qırımtatarlar öz küçü ile şeerde yekâne Cuma-Camini ğayrıdan qurmaqtalar. Qırım Müftiyatı bildirgeni kibi, cami binası 19 asırğa (diger qaynaqlarğa köre – 18 asırğa) ait, uzun vaqıt devamında tamir işleri keçirilmey edi, amma şimdiki akimiyet para bermege vade etse de, sözüni tutmadı.

«Yaqında cami qubbesi köterildi, endi o evel olğanı kibi kare degil de, tögerek şeklindedir. Qubbe qurucılığına 500 biñ ruble kerek oldı, onı kötermege Dagestandan kelgen mütehassıslar yardım etti», – deyler Müftiyatnıñ matbuat hızmetinde.

Al-azırda binanıñ ögüni tamirleyler, caminiñ içinde de işlerniñ keçirilmesi planlaştırıla. Bunıñ ile minareniñ qurucılığı da planlarda bar.

Bina daa Ekinci dünya cenki vaqtında zarar körgen edi. Bundan soñ ğayrıdan qurula edi, amma şimdilik «çoqqa sürgen rekonstruktsiya» alâ bitmey.

Evel Qırımnıñ Qarasuvbazar rayonında Köktaş köyünde cami ğayrıdan qurulğan edi. Qırımtatarlarnıñ muqaddes binasında Oraza bayramında ilk namaz keçirildi. Mında da cami iane esabına quruldı.

XS
SM
MD
LG