Link açıqlığı

Qırımda Rusiye Taqiqat komitetiniñ idaresi Ankarada Bütündünya qırımtatar kongressiniñ keçirilmesi vaqtında Qırımtatar Milliy Meclisi reisiniñ birinci muavini Nariman Celâl, Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyevge Qırımdan çıqmağa yasaq etti. Bu kibi yasaq Qırımtatar Milliy Meclis reisiniñ muavini İlmi Ümerovğa da berile bile.

Bu aqta Qırım.Aqiqatqa Zair Smedlâyev bildirdi.

Onıñ sözlerine köre, salı künü Rusiye Taqiqat komitetiniñ Qırım idaresi Smedlâyev ve Celâlnı «fevral 26» işi boyunca şaatlar olaraq sorğuğa çağırdı.

«Ankarada Bütündünya qırımtatar kongressine qoşulmağa imkânımıznı almaq içün, bizni sorğuğa çağıralar. İlmi Ümerovnı yarın, meni ve Nariman Celâlnı avgust 1 künü», – yazdı Smedlâyev öz Facebook saifesinde.

Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyev Qırım.Aqiqatqa aytqanı kibi, taqiqatçılar «müim işlerde şaat olğanlarnıñ areketlerini sıñırlamağa» aqları bar olğanını bildirgen eken.

«Bizge taqiqat devam etkenini bildirdiler, şunıñ içün celpname boyunca kelmek kerek. Men, Nariman Celâl kibi, avgust birinde kelmek mecburım. İlmi Ümerov yarın, eminim, oña yañı celpnameni bererler. Tabiiy ki, maqsat birdir: çıqıp, kongresste iştirak etmege fırsat bermemek. Kiriş noqtasından keçmege tırışsaq, bizni yaqalaycaqlar», – dey Zair Smedlâyev.

Qırımtatar Milliy Meclisiniñ matbuat hızmeti de avgust 1 künü Celâl ve Smedlâyevniñ sorğuğa çağırılğanı aqta bildire.

«Mecliste bunı 2015 senesi avgust 1-2 künleri Ankarada keçirilecek II Bütündünya qırımtatar kongressine qoşulmasına mania olaraq tanıylar», – denile beyanatta.

Rusiye Taqiqat komitetiniñ Qırım idaresinden resmiy izaat şimdilik yoq.

II Bütündünya qırımtatar kongressi birinci kongress teşkil etilgeni kibi şekillene. Amma siyasiy şaraitleri endi başqa, qırımtatar halqınıñ temsiliy organları – Qurultay ve Meclis – Qırımda Rusiye akimiyeti tarafından basqı altında buluna, tanılğan yetekçiler Mustafa Cemilev ve Refat Çubarov Qırımdan sürgün etilgen, Qırımtatar Milliy Meclis reisiniñ muavini Ahtem Çiygoz Aqmescit SİZOsında qapalı, Qırımtatar Milliy Meclisiniñ bazı azalarına qarşı cinaiy işler açıldı.

Malüm olğanı kibi, Qırımnıñ Rusiye akimiyeti Ankarada (Türkiye) avgustnıñ başında keçirilecek Bütündünya qırımtatar kongressi ile bağlı qasevetini endi defalarca bildirdi.

XS
SM
MD
LG