Türkiyede qırımtatar diasporasınıñ temsilcisi ve «Bilkent» Türkiye universitetiniñ professorı Hakan Kırımlı dey ki, qırımtatar halqı iç bir vaqıt Qırımnıñ Rusiye tarafından işğalini tanımaz ve Ankaradaki Bütündünya qırımtatar kongressi bunı isbatlar.
Bu aqta o Qırım.Aqiqatqa bildirdi.
Qırımlı aytqanı kibi, Kreml tarafından idare etilgen qırımtatar teşkilâtları qırımlılar Qırımnıñ Rusiyege qoşulmasından memnün olğanını köstermege tırışalar. Türkiye professorı tüşüngenine köre, bu kibi teşkilâtlar qırımtatarlarnıñ yarımada işğaline qarşı çıqqanını gizlemege tırışalar. Avgustnıñ başına planlaştırılğan kongress, Kırımlınıñ fikrine köre, «yalanğa qarşı küreş aleti» olmalı.
«Qırımtatarlar iç bir vaqıt işğalni tanımaz, çünki Rusiye tarafından Qırımnıñ zaptı halqnı yoq ete bilecegini añlaylar», – dey Kırımlı.
Ekspert Rusiye Federatsiyasınıñ şimdiki areketlerinden sebep Qırımnı terk etmege mecbur olğan vatandaşlarnıñ sayısı ep artqanından sebep yazıqsınuvını bildirdi.
Türkiyede keçirilecek Bütündünya qırımtatar kongressine bir qaç kün qaldı. Qırımtatar Milliy Meclisiniñ malümatına köre, Rusiye akimiyeti qurultaynıñ Qırım vekillerine basqı ete ve Ankarağa baracaqlarğa keder etecek ola.
Qırımtatar Milliy Meclisi reisiniñ birinci muavini Nariman Celâl, Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyev Rusiye Taqiqat komitetine sorğuğa çağırıldı.
Malüm olğanı kibi, Qırımnıñ Rusiye akimiyeti Ankarada (Türkiye) avgustnıñ başında keçirilecek Bütündünya qırımtatar kongressi ile bağlı qasevetini endi defalarca bildirdi.
