Türkiyede Bütündünya qırımtatar kongressiniñ teşkilâtçılarından biri, «Qırım türkleriniñ medeniyet ve yardımlaşma dernegi»niñ reisi Nukremin Şahin Qırımda Rusiye akimiyeti ve Kreml tarafdarları kongressni bozıp olamaycağını bildirdi.
Böyleliknen o Qırım.Aqiqatqa Qırımnıñ Rusiye Devlet Şurasınıñ spiker muavini ve «Qırım» cemaat teşkilâtınıñ reisi Remzi İlyasovnıñ Türkiye prezidenti Recep Tayip Erdoğanğa bu tedbirge qoşulmamaq ricasını izaatladı.
«Olarnıñ bu kibi bildirüvlerni etecegi aqqında bile edik. Olarnıñ Erdoğanğa muracaatları manasızdır. Qurultaynıñ keçirilmesine tesiri olmaz», – dey Şahin.
Onıñ sözlerine köre, Rusiye akimiyeti yarımadada yaşağan qırımtatarlarğa basqı ete bile, amma kongressniñ keçirilmesine keder etip olamazlar. Şahin dey ki, qurultayda iştirak etmek içün 180 cemaat teşkilâtınıñ temsilcileri ariza yollağanlar.
Türkiyede keçirilecek Bütündünya qırımtatar kongressine bir qaç kün qaldı. Qırımtatar Milliy Meclisiniñ malümatına köre, Rusiye akimiyeti qurultaynıñ Qırım vekillerine basqı ete ve Ankarağa baracaqlarğa keder etecek ola.
Qırımtatar Milliy Meclisi reisiniñ birinci muavini Nariman Celâl, Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyev Rusiye Taqiqat komitetine sorğuğa çağırıldı.
Malüm olğanı kibi, Qırımnıñ Rusiye akimiyeti Ankarada (Türkiye) avgustnıñ başında keçirilecek Bütündünya qırımtatar kongressi ile bağlı qasevetini endi defalarca bildirdi.
