Link açıqlığı

Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyev iyül 28 künü onı ve Meclis yolbaşçılarını Qırımda Rusiye Taqiqat komitetiniñ idaresine çağırğanlarını bildire.

«Qırımtatar Milliy Meclisi reisiniñ birinci muavini Nariman Celâl, Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyev davet etile, bes-belli daa bir kimse, amma tam malümatnı şimdilik bilmeyim», – yazdı Smedlâyev Facebookta.

Onıñ fikrine köre, böyleliknen Meclis temsilcilerine ve faallerge Ankarada keçirilecek Bütündünya qırımtatar kongressine yol qapatacaq olalar

«2014 senesi fevral 26 işi boyunca kene peyda olğan şaraitler akimiyet tarafdarı olğan qırımtatar teşkilâtları azalarınıñ ricası ile bizge 2015 senesi avgust 1-2 künleri Ankarada keçirilecek Bütündünya qırımtatar kongressine qoşulmağa imkân bermemek tırışqanları manasında kelgendir», – yaza Smedlâyev.

«Bunın ile, böylece, bizge iyül 28 künü saat 14:30 Ahtem Çiygoznıñ işi boyunca keçirilecek mahkeme toplaşuvında iştirak etmek imkân bermeyler», – dey o.

Salı künü sorğuğa Meclis reisiniñ muavini İlmi Ümerov da davetlidir.

«Resmen fevral 26 işi, yani Ahtem Çiygoznıñ işi boyunca çağırdılar, iç olmağanda, Taqiqat komitetiniñ taqiqatçısı tarafından imzalanılğan celpnameni maña bergen FSB hadimleri öyle aytqanlar… Olar bizge Qırımdan çıqmağa fırsat bermeyceklerini de bildirdiler…», – yaza Ümerov Facebookta.

FSB ve Qırımda Taqiqat komitetiniñ idaresinden resmiy izaat berilmey.

II Bütündünya qırımtatar kongressi birinci kongress teşkil etilgeni kibi şekillene. Amma siyasiy şaraitleri endi başqa, qırımtatar halqınıñ temsiliy organları – Qurultay ve Meclis – Qırımda Rusiye akimiyeti tarafından basqı altında buluna, tanılğan yetekçiler Mustafa Cemilev ve Refat Çubarov Qırımdan sürgün etilgen, Qırımtatar Milliy Meclis reisiniñ muavini Ahtem Çiygoz Aqmescit SİZOsında qapalı, Qırımtatar Milliy Meclisiniñ bazı azalarına qarşı cinaiy işler açıldı.

Malüm olğanı kibi, Qırımnıñ Rusiye akimiyeti Ankarada (Türkiye) avgustnıñ başında keçirilecek Bütündünya qırımtatar kongressi ile bağlı qasevetini endi defalarca bildirdi.

XS
SM
MD
LG