Qırımnıñ Ukrain medeniy merkeziniñ faalleri Kefede merkez kitaphanesiniñ bölügini açmaq planları aqqında bildireler. Bu aqta Facebook saifesinde Ukrain medeniy merkeziniñ faalisi Veldar Şukurciyev bildirde, – haber ete Qırım.Aqiqat.
«Biz Qırımnıñ Ukrain medeniy merkezi kitaphanesiniñ bölügini Kefede açamız. Bu, şübesiz, Qırımnıñ eñ parlaq medeniy adiselerinden biri. Eminmiz ki, oquyıcılarnıñ merağı artacaq ve kitaphanemizniñ bölükleri Qırımnıñ diger şeerlerinde de peyda olur. Pervasız qalmağan ve fondlarımıznı toldurmağa yardım etken ukrainlerge pek minnetdarmız», – dey o.
Şukurciyevniñ sözlerine köre, Kefede kitaphane bölügini Qırımğa ukrain tilinde kitaplarnı yollağan insanlarnıñ faalligi sayesinde açmağa imkân peyda oldı. Kitaplardan bazıları ekişer kelgeninden sebep, faаller Aqmescitte açılması planlaştırılğan kitaphaneden ğayrı, fillialını da açmağa qarar aldılar.
O, Qırım içün kitaplarnı toplamağa devam etkenlerini bildirdi. Mında «Ukrain kitabınıñ top 100» toplamından kitaplarnı bekleyler ve yañı nushalarnı yollamağa rica eteler.
Veldar Şukurciyev şimdilik ukrain kitaphanesi içün bina daa tapılmağanını da qayd etti.
«Biz tek özümizge ve göñüllilerniñ yardımına işanamız», – dey o.
Qırım.Aqiqat bildirgeni kibi, şimdilik kitaphane fondu bir 100 kitaptan ibaret. Amma bina olmağanından sebep, faaller kitaplarnı öz evlerinde saqlaylar.
