Ukraina prezidentiniñ qırımtatarlarnıñ işlerinden vekâletlisi Mustafa Cemilevniñ faaliyetini temin etüv bölüginiñ başı Arsen Jumadilov Odessa vilâyetinde Belâyevsk rayon devlet memuriyeti başınıñ vazifesine keçecek üç namzetten biri ola.
Bu aqta Odessa vilâyeti devlet memuriyetiniñ matbuat hızmeti bildire.
Matbuat hızmetiniñ malümatına köre, iyül 25 künü rayon devlet memuriyetleriniñ başları vazifesine namzetler yerli sakinler ile körüştiler.
«Belâyevsk rayon devlet memuriyetleriniñ başı vazifesine üç namzet kösterilgen: Odessa adliyecisi Oleg Varivoda, Teplodar iş adamı Andrey Dotsenko ve yarımada işğalinden soñ Kiyevde yaşağan ve çalışqan Qırım siyasetşınası Arsen Jumadilov», – denile beyanatta.
Vilâyet devlet memuriyetinde bildirilgeni kibi, «Ukraina tarihında ilk sefer rayon devlet memuriyetleriniñ başını tayinlev ketişatına yerli sakinler ile körüşüv kirsetildi. Sakinler öz fikirlerini ayta, suallerini bere bilecek».
Jumadilovnıñ özü ola bilecek tayinlenüvini izaatlamay. Cemilevniñ ofisinde de izaat şimdilik berilmey.
Belâyevsk rayonı – Ukraina Odessa vilâyetiniñ cenübiy-şarqındaki memuriy birlemdir.
