Qurultaynıñ Merkeziy saylav komissiyasınıñ başı Zair Smedlâyev QHA agentligine bergen izaatında «Qırım» cemaat teşkilâtınıñ konferentsiyası iştirakçileriniñ Türkiye prezidenti Recep Taiyp Erdoğanğa avgust 1-2 künleri keçirilecek Bütündünya qırımtatar kongressine qol tutmamaq kibi ricasını tenqit etti.
«Ankarada olacaq Bütündünya qırımtatar kongressiniñ keçirilmesi aqta qarar Qırımda alınmağanından sebep, onıñ qanunsız olğanı aqqında bildirüvler aqılğa sığmay! Birinciden, Bütüdünya Kongressniñ kеçirilmesi içün qararnı yolbaşçı organı almalı ve buña qırımtatar memurlarınıñ şorbacılarından izin kerekmey. Ekinciden, keçirüv yerini de yolbaşçıları saylay ve dünyada eñ büyük qırımtatar diasporası Türkiyede yaşağanını köz ögümizge alsaq, qararnıñ doğru olğanını añlaymız», – dey Smedlâyev.
O, Qırımtatar Milliy Qurultayınıñ 200 vekili «Qırım» areketiniñ konferentsiyasında bulunğanı aqta bildirüvni de yalan olaraq adladı, aytqanı kibi, tedbirde «bir 20 vekil işitrak etti, esasen memurlar ve olarnıñ hızmetçileri».
Qırımnıñ Rusiye devlet şurasınıñ reisi muavini Remzi İlyasov Bütündünya qırımtatar kongressi Türkiye paytahtı Ankarada degil de, Qırımda keçirilmek kerekligini tüşüne eken.
İyül 25 künü Qırımda Rusiye tarafdarı «Qırım» cemaat teşkilâtınıñ konferentsiya iştirakçileri Türkiye prezidenti Recep Taiyip Erdoğanğa avgust 1-2 künleri Bütündünya qırımtatar kongressini keçirmemek ricası ile muracaat ettiler.
Malüm olğanı kibi, Qırım akimiyeti endi bir qaç kere II Bütündünya qırımtatar kongressiniñ keçirilmesi boyunca öz qasevetini bildirgen edi.
