Qırımda Rusiye tarafdarı «Qırım» cemaat teşkilâtınıñ konferentsiya iştirakçileri Türkiye prezidenti Recep Taiyip Erdoğanğa avgust 1-2 künleri Bütündünya qırımtatar kongressini keçirmemek ricası ile muracaat eteler, – haber ete TASS.
«Matbuat vastalarından belli olğanı kibi, teşkilâtçılar kongress olaraq adlanğan tedbirge sizni de davet ettiler. Sizni ikmetli olmağa ve memleketlerimiz arasında munasebetni bozmaq içün azırlanılğan halqara tarikniñ aleti olmamağa çağıramız», – denile beyanatta.
Qırımnıñ Rusiye devlet şurasınıñ reisi muavini Remzi İlyasov Bütündünya qırımtatar kongressi Türkiye paytahtı Ankarada degil de, Qırımda keçirilmek kerekligini tüşüne eken.
Onıñ sözlerine köre, tedbirniñ kün tertibi «Rusiyege qarşı siyasiy tüste qurulacaq», maruzacılar ise «tatarlarğa nisbeten uydurılğan taqiplerni muzakere etecek ve Qırımnıñ Ukraina terkibine qaytmasını talap etecektirler».
Malüm olğanı kibi, Qırım akimiyeti endi bir qaç kere II Bütündünya qırımtatar kongressiniñ keçirilmesi boyunca öz qasevetini bildirgen edi.
