Türkiye Ankarada keçirilecek II Bütündünya qırımtatar kongressinine azırlıq ketişatı soñuna yetkeni aqqında Facebook saifesinde Qırımtatar Milliy Meclis reisi Refat Çubarov bildirdi.
«Ukraina, Qırğızistan, Qazahistan, Kanada, Litvaniya, Poloniya, Rusiye, AQŞ, Romaniya, Türkiye, Frenkistan ve Avropanıñ diger memleketlerinden bir 200 qırımtatar cemaat teşkilâtlarınıñ vekilleri iştirak etecek II Bütündünya qırımtatar kongressinine azırlıq ketişatı soñuna yetti», – yaza Çubarov.
Hatırlatamız, Kongress Ankaradaki 750 insannı sığdırğan «Bilkent Otel» konferents-zalında keçirilecek. Teşkilâtçılar Ankarağa Kongress vekilleri ve musafirleri olaraq kelmege istegen qırımtatar cemaat teşkilâtları temsilcileriniñ sayısı çoq olğanından sebep büyük salonnı sayladılar.
II Bütündünya qırımtatar kongressiniñ işine Qurultay ve Meclisni tanığan ve olarnıñ qararlarına köre faaliyet köstergen bütün qırımtatar cemaat, siyaset teşkilâtları ve areketleri, fond, sanat taqımları, milliy matbuat vastaları davet etile.
Ukraina, Türkiye, Romaniya, Bulğaristan, Rusiye, Poloniya, Qazahistan, Qırğızistan, Frenkistan, Amerika Qoşma Ştatları ve diger memleketlerden iştirakçilerniñ kelmesi beklenile.
Cemaat teşkilâtlarından ğayrı Kongresske Qırımtatar Milliy Meclisiniñ azaları, tevtiş komissiyasınıñ azaları, regional Meclislerniñ reisleri ve olarnıñ muavinleri, Qırım musulmanları Diniy idaresiniñ vekilleri davet etilecek.
I Bütündünya qırımtatar kongressi Aqmescitte 2009 senesi mayısta olıp keçken edi. Kongresste tahminen 800 kişi iştirak etken edi – 12 memleketten 160 qırımtatar cemaat-siyasiy teşkilâtınıñ vekili.
