Qırımtatar Milliy Meclisi reisiniñ muavini İlmi Ümerovğa Qırımda yıl devamında alğan nefaqasını doquz qat qısqarttılar.
İlmi Ümerov bıltır avgust ayında Bağçasaray rayon devlet memuriyetiniñ başı vazifesinden vazgeçti. Çünki o vaqıt Rusiye devlet hızmetçisiniñ antını bermege istemedi. O zaman o saqatlıq nefaqasını resmiyleştirdi.
«Mende Parkinson hastalığı ileriley. Onı bazıda biraz toqtatmaq ya da alışmaq mümkün, amma bütünley tedaviylenmek imkânsız», – tarif ete Ümerov Qırım.Aqiqatqa.
Meclis reisiniñ muavini aytqanı kibi, 2014 senesi ukrain qaidelerine köre Parkinson hastalığı sebebinden oña sakatlıqnıñ ekinci gruppasını berdiler. «Bu gruppa işlememek ve berilgen paradan 90% elde etmege fırsat bere. Maña keçici müddet qaideleri boyunca 38 biñ ruble bere ediler», – dey Ümerov.
Amma bir yıldan soñ, Meclis reisiniñ muavini aytqanına köre, saqatlıq gruppasını tasdiqlamağa vaqıt kelgende, onıñ teşisi endi ekinci gruppağa uymadı, tek – üçünci. Tibbiy-içtimaiy teşkerüvniñ neticesi öyle edi.
«Bu – iş gruppasıdır. Rusiye qaidelerine ya da Pension fondunda alınğan añlatuvlarğa köre, gruppa deñiştirilse, nefaqanı da ğayrıdan sayıp baqmaq kerek. Endi men içtimaiy nefaqanı elde etecem, oña köre ne devlet hızmetçisiniñ tecribesi, ne alğan aylığımnıñ miqdarı köz ögüne alınmay. Saqatlıqnıñ üçünci gruppası olğanda, işlemek kerekim. Amma devlet hızmetine qaytamam, çünki Rusiye Federatsiyasınıñ qanunlarını tanımayım», – dep añlata Meclis reisiniñ muavini.
Ümerovnıñ aytqanı kibi, endi oña nefaqanı 8 biñ ruble miqdarında bermege vade eteler. «Pension yaşıma yetmegenimden sebep, buña daa eki yıl bar, berilgen paradan tek 50% elde etecem, yani dört biñ ruble», – dep qoştı o.
Böyleliknen, Ümerovnıñ nefaqası doquz qat qısqartılacaqtır. Deñişüvler şu yılnıñ avgust ayından amelge keçecek.
