Link açıqlığı

İlyasov Bütündünya qırımtatar kongressiniñ Ankarada degil, Qırımda keçirilmesini istey


Qırımnıñ Rusiye devlet şurasınıñ reisi muavini Remzi İlyasov Bütündünya qırımtatar kongressi Türkiye paytahtı Ankarada degil de, Qırımda keçirilmek kerekligini tüşüne, – haber ete matbuat hızmeti.

«Cumhuriyet ve federal akimiyetlerniñ milletlerara ziddiyetlerge yol bermemek içün yapılğan ğayretine baqmadan, köngerssniñ keçirilmesi ve neticeleri yarımadağa qavmiy, soñra ise siyasiy qarşılıqnı meydanğa ketirir. Eminim, er angi halqnıñ bu kibi bütündünya kongressleri ve forumları onıñ Vatanında, yaşağan toprağında keçirilmek kerek – tek o vaqıt yardım ve destek kösterilecektir. Aks alda bir sıra sual peyda ola ve bu kibi qurultaylarnıñ neticesinde qabul etilgen qararlarnıñ qanuniy olğanı şübe doğura», – dey İlyasov.

Onıñ sözlerine köre, tedbirniñ kün tertibi «Rusiyege qarşı siyasiy tüste qurulacaq», maruzacılar ise «tatarlarğa nisbeten uydurılğan taqiplerni muzakere etecek ve Qırımnıñ Ukraina terkibine qaytmasını talap etecektirler».

İlyasov şunı da bildirdi ki, iyül 25 künü «Qırım» qırımtatar halqınıñ regionlarara cemaat areketiniñ forumında iştirakçiler Bütündünya qırımtatar kongressi ile bağlı problemlerni muzakere etecek.

Malüm olğanı kibi, Qırım akimiyeti endi bir qaç kere II Bütündünya qırımtatar kongressiniñ keçirilmesi boyunca öz qasevetini bildirgen edi.

XS
SM
MD
LG