Qırımda daa bir qırımtatarı ğayıp oldı – Aqmescit rayonı Eski Lez köyüniñ sakini 28 yaşında Bitla Ümerov. İyül 19 künü Aqmescitke ketip, evge qaytmadı. Bu aqta «Qırımtatar göñüllileri» cemaat teşkilâtı bildire.
Qırım.Aqiqatqa Qırımtatar halqınıñ aqlarını qoruvı boyunca komitetniñ koordinatorı Eskender Bariyev aytqanı kibi, bugünge Qırımda ğayıp olğan insanlarnıñ cedveline 21 insan kire. Em qırımtatarlar, em ükrainler.
«Uquq qoruyıcı organlarğa resmiy muracaatlar bar edi. Amma bazı işler endi qapatılğan, insanlar tapılmasa da. Yerli akimiyet bu insanlarnıñ qıdıruvı ile meraqlanmağanını köremiz», – dey Bariyev.
Qırım işğalinden soñ yarımadada bir qaç qırımtatarı ğayıp oldı: Timur Şaymardanov (mayıs 26-da ğayıp oldı), Seyran Zinedinov (mayıs 30-da ğayıp oldı), İslâm Cepparov ve Cavdet İslâmov (sentâbr 27-de ğayıp oldılar), Eskender Apselâmov (oktâbr 3 künü). Qırımda Taqiqat komiteti beş cinaiy işni açtı, amma bu insanlarnıñ bulunuv yerleri aqta alâ daa malümat yoq. Öldürüv ve hırsızlanuv boyunca işler açıldı.
Bıltır dekabr ayında qırımtatarlarnıñ yetekçisi Mustafa Cemilev Rusiye tarafından Qırım işğal etilgeninden soñ qırımtatar halqınıñ 18 temsilcisi ğayıp olğanı aqta bildirgen edi.
