Bu künleri işğal etilgen Qırımğa kelgen Frenkistan deputatları cuma künü Yaltanı ziyaret etip, yalı kenarında yerli sakinler ile subetleştiler.
Qırımnıñ Rusiye Devlet şurasınıñ matbuat hızmeti bildirgeni kibi, «Yalta sakinleri musafirlerni ötmek ile tuznen qarşıladılar».
«Frenksitan senatorları Avropalılarnıñ Qırım aqqında adetiy tasavurı ve aqiqat arasında farqnı qayd ettiler», – deyler matbuat hızmetinde.
«Mında Qırımda yaşağan ve Rusiyege qaytaqan raat, bahtlı halqnı kördik», – dep bildire matbuat hızmeti senator Jak Miarnıñ sözlerini.
Frenkistan deputatlarını Qırım spikeri Vladimir Konstantinov, Rusiyeniñ SNG işleri boyunca Devlet şurasınıñ komiteti reisi Leonid Slutskiy ve muavini Оleg Lebedev ozğardılar.
Slutskiy senatorlarnıñ ziyaretini timsaliy olaraq adladı.
«Qırımğa kelgen deputatlar Rusiye tarafdarları degil – Frenkistan, Avropa siyasetçileriidir. Adiselerniñ aqiqiy tarzda kösterilmesini tüşüne ve evlerine Rusiyede olayatqanı aqta doğru malümatnı ketirecekler. Endi böyle ziyaretler sıq keçirilecek ve parlament diplomatiyası canlanır. «Strategik dostlarımız» Rusiye mecazını bozıp olamaz», – dey o.
Cumaaqşamı künü, iyül 23-te, aqşam Frenkistan deputatlarınıñ gruppası Qırımğa keldi. Qırım parlamentiniñ matbuat hızmeti bildire ki, deputatlarnı Aqmescit ava limanında Qırımnıñ Rusiye Devlet şurasınıñ reisi Vladimir Konstantinov, onıñ birinci muavini Konstantin Baharev ve prezidium azası Yefim Fiks qarşıladılar.
Frenkistan Tışqı işler nazirligi mezkür ziyaretni halqara uquqnıñ bozulması olaraq tanıdı.
Ukraina Tışqı işler nazirligi, deputatlarnıñ Qırım ziyareti ukrain tarafı ile muzakere etilmegenini ve aqibetleri olacağını bildirdi.
