Link açıqlığı

Qırımnıñ Rusiye Devlet şurası reisiniñ muavini Remzi İlyasov iyül 23 künü yarımadağa kelgen Frenkistan deputatları ile körüşüvde Qırım Rusiye nezareti altına keçkeninden soñ qırımtatar halqınıñ aqları bozuluvı aqta malümatnı red etti.

Bu aqta Qırım parlamentiniñ matbuat hızmeti bildire.

«Remzi İlyasov Qırımnıñ Rusiye terkibine keçmesi yarımadağa yaşağan bütün halqlar, şu cümleden qırımtatar halqı içün taliyiy bir vaqia olğanı aqta bildirdi», – denile beyanatta.

«Milliy farqlar birligimizge keder etmey. Yekâne maqsat ve vazifelerimiz bar, ayatnıñ bütün manialarına azırmız. Qırımtatarlar da iç bir ayırımnı is etmey», – qayd etti İlyasov.

Evel Qırım parlamentiniñ spikeri Vladimir Konstantinov Frenkistan deputatlarına «referendum» ve yarımadanıñ Rusiye terkibine qoşuluvı qırımlılarnı «mecburiy ukrainlileşüvden» qorçalağanı aqta bildirgen edi.

Cumaaqşamı künü, iyül 23-te, aqşam Frenkistan deputatlarınıñ gruppası Qırımğa keldi. Qırım parlamentiniñ matbuat hızmeti bildire ki, deputatlarnı Aqmescit ava limanında Qırımnıñ Rusiye Devlet şurasınıñ reisi Vladimir Konstantinov, onıñ birinci muavini Konstantin Baharev ve prezidium azası Yefim Fiks qarşıladılar.

Frenkistan Tışqı işler nazirligi mezkür ziyaretni halqara uquqnıñ bozulması olaraq tanıdı.

Ukraina Tışqı işler nazirligi, deputatlarnıñ Qırım ziyareti ukrain tarafı ile muzakere etilmegenini ve aqibetleri olacağını bildirdi.

XS
SM
MD
LG