Qıtaiy Ukrainada işlemege başlağan ATR birinci qırımtatar telekanalı canlı yayında aktual Qırım sualleri muzakere etilecek talk show azırlamaq niyetindedir. Bu aqta Kiyevde keçirilgen matbuat konferentsiyasında ATR qırımtatar telekanalı baş müdiriniñ muavini Ayder Mujdabayev bildirdi, – haber ete Qırım.Aqiqat mühbiri.
«Biz er afta canlı yayında belli siyasetçi, ekspertler tarafından Qırım ile bağlı meseleler muzakere etilgenini isteymiz. Biz ne Ukraina siyasetçilerine, ne cemaat fikrine Qırım meselelerinden çetleşmege imkân bermemiz. Farqlı insanlarnı davet etecekmiz, eminmiz ki, olar canlı yayında kergin meselelerni muzakere etmege ve cevap bermege razı olurlar», – tarif ete Ayder Mujdabayev.
ATR telekanalı bazarertesi künü, iyül 20-de, Zaman haber yayınlarına yañıdan başladı.
İyün 17-de «ATR» ve «LÂLE» telekanalları uydu ve internet vastasınen Kiyevden yayın yapmağa başladılar. İyün 18-de telekanal saibi Lenur İslâmov bunı Qırımtatar Milliy Meclisiniñ reisi Refat Çubarovnıñ iştiraki ile keçirilgen Kiyevdeki matbuat konferentsiyasında resmiy şekilde bildirdi. İslâmov qayd etti ki, Qırımda qalğan jurnalistlerniñ Kiyevden yapılğan yayınğa alâqaları yoq.
2015 senesi aprel 1-den itibaren dünyanıñ yekâne ATR qırımtatar telekanalı yarımadadan yayın yapıp olamay, çünki Rusiye litsenziyasını alamadı.
ATR yayını toqtatılğan soñ cumhuriyet akimiyeti cemaat qırımtatar televideniyesini açmağa teklif etti. Olarnıñ fikirince, qırımtatarlarnıñ kerçek malümatlarnı almaq aqqı böyle etip yerine ketirilecek.
