Qırımda yarımadanıñ gaznen temin etilmesi leyhalarını azırlamaq niyetindeler, – dep bildirdi Qırım ükümetiniñ şimdiki yolbaşçısı Sergey Aksenov. Qırım Rusiye ükümetiniñ matbuat hızmeti bildire ki, bunı Aksenov Sudaq civarındaki Qutlaq köyünde (Veseloye, – QA) gaz açılış merasiminde bildirdi.
«Bizler bu sene bütün leyharlarnı azırlamaq içün çalışamız, bütün leyha vesiqalarını azırlap, kelecek sene işke başlaycaq olamız. Esnas kete, eki yıl içinde Qırımnı gaz ile temin eterik, dep tüşünemiz», – dedi o.
Aksenovnıñ qayd etkenine köre, şimdiki akimiyetniñ «eyi işleri» endi başlana.
Kütleviy haber vastalarınıñ malümatına köre, Qırımnıñ gaz ile temin etilmesi devlet programmasınıñ azırlanmasını 2017 senesine qadar qaldırdılar, çünki tender olmadı, eki leyha institutlarınıñ arizaları ise red etildi.
Aqyarda 2014 senesinden itibaren gaz temini programmasınıñ amelge keçirilmesi toqtatıldı.
2015 senesi mart ayında Aksenov bir buçuq yıl içinde bütün yarımadanı gaznen temin etmege vade etti.
