«Çonğar» kiriş noqtasında iyül 21-den itibaren bugünki künge qadar Qırım tarafında, işğalden soñ yarımadağa kiriş ve çıqışnı Rusiye hızmetleri nezaret etken yerde, bazı naqliyat vastaları içün sıñırlar bar.
Bunı iyül 23-te Kiyevdeki brifingde Ukraina Devlet sıñır hızmeti matbuat hızmetiniñ reberi Oleg Slobodân bildirdi, dep haber ete Qırım.Aqiqat mühbiri.
«İşğal etilgen Qırım Muhtar Cumhuriyetinde Rusiye tarafı «Çonğar» kiriş-çıqış nezaret noqtasınıñ qarşısında Rusiye Federatsiyasınıñ sıñır hızmetiniñ elektron bazası bozulğanından sebep yük ve adamlarnı kirsetmey. İşğal etilgen Canköyde Rusiye nezareti Qırım Muhtar Cumhuriyetinde yaşağan vatandaşlarnı ve gümrük nezaretinden keçmegen yükni kirsete», – dep ayta Slobodân.
Onıñ bildirgenine köre, iyül 22-de saat 15-ten saat 18-ge qadar aynı sebepten «Çaplinka» kiriş noqtasınıñ işi toqtatılğan edi, al-azırda kiriş açıldı. «Çonğar» alâ da sıñırlı rejimde çalışa.
Qırımda ve Rusiye sıñır hızmetinde yarımadadaki kiriş noqtalarınıñ işini izaatlamaylar.
Ukraina Devlet sıñır hızmeti Qırımğa yol alğan vatandaşlarğa yarımadağa «Çonğar» kiriş noqtasından kirmemege tevsiye etken edi. Ukrain sıñırcıları bergen malümatına köre, Rusiye hızmetleriniñ «elektron sisteması bozuldı ve olar ukrain nomeraları ile maşinalarnı ve yük maşinalarını kirsetmeyler».
