Avropa parlamentiniñ tışqı işler komiteti reisi Elmar Brok bildirdi ki, Rusiye Minsk añlaşmaşlarına riayet etmese ve istilâ siyasetini devam ettirse, Avropa birliginiñ cezaları artacaq.
Bunı Brok Ukraina ziyareti ögüne German Marshall Fondunda çıqışta bulunıp ayttı, dep haber ete Radio Svoboda.
«Minsk añlaşmaları yerine ketirilgenine qadar cezalar olacaq, faqat Rusiye istilâsı devam etse, cezalar artacaq», – dep ayttı Elmar Brok.
Onıñ bildirgenine köre, «cezalar – istilâcığa istilâ içün büyük ceza bar olğanını barışıq yolunen köstermege imkân bergen yekâne usuldır».
Broknıñ fikirince, Rusiye energetik rıçakları sayesinde Avropağa tesir etmege devam ete.
«Energetik siyaseti Rusiyege doğru işaret bermege keder ete. Bizler serbest bazarmız, lâkin umumiy energetik strategiyamız yoq. Şimdi Energetik ittifağını quracaq olamız, böylece Pütinge doğru işaretlerni yollamaq imkânlarımız artacaq», – dedi Brok.
Cumaaqşamı künü, iyül 23-te, Avropa parlamentiniñ tışqı işler komitetiniñ reisi Elmar Brok yolbaşçılığında eyyet Ukrainağa kele. Avropa parlamentiniñ matbuat hızmeti bildirdi ki, eyyet Ukrainada iyül 25-ke qadar bulunacaq, soñra Gürcistanğa yol alacaq. Avropa parlamentiniñ deputatları Kiyevde devlet reberleri, siyasiy firqalarnıñ liderleri, OSCE mahsus monitoring missiyasınıñ nezaretçileri ve cemaat ile körüşmege planlaştıralar.
