Ukraina Devlet sıñır hızmetiniñ Azaq-Qara deñiz regional idaresi vaqtınca işğal etilgen Qırım ile memuriy sıñırda qanunsız faaliyet ile küreş tedbirlerini azırladı. Kiriş noqtalarında qabarcılıq ile küreş yollarından biri – qabar almağan sıñır hızmetiniñ hadimlerine mukâfat bermektir.
Bunı Herson vilâyetiniñ devlet memuriyetiniñ saytında bildireler.
Berilgen malümatqa köre, iyün 18-20 künleri «sıñırnı» keçkende 15 kişi 200 grivnadan 1200 grivnağa qadar qabar bermege tırıştı. Cemaat faalleri kiriş noqtalarındaki qabarcılıq aqqında sıq-sıq bildireler.
«UDSH Azaq-Qara deñiz regional idaresiniñ yolbaşçısı, polkovnik Sergey Budilo bildirdi ki, qabar almağan er bir sıñırcı endiden soñ para mukâfatını alacaq (eñ küçük mukâfat 300 grivnanı teşkil etecek, onıñ miqdarı teklif etilgen qabar miqdarına bağlı olacaq», – dep aytıla haberde.
Herson vilâyetiniñ devlet memuriyetiniñ saytında aytıla ki, Berdânsk ve Herson sıñır bölüklerinde 2015 senesi devamında 23 cinaiy ve 99 memuriy cinayet qayd etildi. Qabarcılıq ile küreş tedbirleri devamında sıñır hızmetiniñ eki yolbaşçısı vazifesinden endirildi, olardan biri – «Çonğar» kiriş noqtasınıñ yolbaşçısı ve üç zabit.
2014 senesi mart ayında Qırım Rusiye tarafından işğal etilgen soñ qıtaiy Ukraina ve yarımada arasında formal, asılında ise – tam bir sıñır peyda oldı.
Qırım vaqtınca işğal etilgen topraq olaraq ilân etildi. Bugünge qadar qıtaiy Ukrainanıñ Qırım ile «sıñırında» üç kiriş sıñır noqtası mevcut: «Perekop», «Armânsk» ve «Canköy», soñki ekisini Rusiyede halqara dep adlaylar.
2015 senesi iyün ayından itibaren Qırım ile memuriy sıñırnı keçüv qaideleri deñişti.
