Link açıqlığı

Avropa parlamentinde Frenkistan vekilleriniñ Qırım ziyaretini takbih eteler, dep ayttı Avropa parlamentiniñ Litvaniya deputatı Petras Auştrâviçüs, haber ete RBK-Ukraina.

«Qayd etmek isteyim ki, bu Avropa parlamentiniñ baqışlarına uymay. Bu ziyaretni takbih etemiz. Avropa Birliginiñ baqışlarına zıt kele. Bu şahsiy ziyaret ve Avropa Birliginiñ Qırım munasebetinen bağlı degil. Qırım Rusiye tarafından işğal etildi ve Ukrainanıñ bir qısmı olıp qala», – dedi Auştrâviçüs.

Onıñ qayd etkenine köre, Avropa parlamentinde Qırımda ve işğal etilgen Donbassta insan aqlarınıñ bozulması ile bağlı yıl esabatını azırlaycaqlar.

«Biz Avropa parlamentinde işğal etilgen Qırım, em de Ukraina şarqnda insan aqlarınıñ bozulması ile bağlı cemaat diñlevlerini keçirmege devam etemiz. Bizler vatandaşlar cemiyeti, halq teşkilâtları ve ukrain akimiyeti ile daa semereli fikir paylaşmasını qıdıramız. Bizler bu vaziyet boyunca er yıllıq esabatnı azırlamaq kerekmiz», – dedi deputat.

Bundan evel berilgen malümatqa köre, Frenkistannıñ 10 deputatından ibaret eyyet bu afta Qırımğa eki künlik ziyareti ile kele – iyül 23-24 künleri.

Eyyet Yalta ve Aqyarnı ziyaret etip, yerli akimiyet ile körüşecek ola. Qırımğa kelecek olğan eyyet reberi Tyerri Mariani bildirdi ki, bu teşebbüs deputatlarğa ait, Frenkistan ükümetiniñ iç bir alâqası yoq.

Frenkistan Tışqı işler nazirligi mezkür ziyaretni halqara uquqnıñ bozulması olaraq tanıdı.

Ukraina Tışqı işler nazirligi, deputatlarnıñ Qırım ziyareti ukrain tarafı ile muzakere etilmegenini ve aqibetleri olacağını bildirdi.

Ukraina ve Ğarp memleketleri Qırım işğalini tanımay ve Rusiyeni cezalaylar.

2015 senesi iyün ayından itibaren Qırım ile memuriy sıñırnı keçüv yañı qaideleri çalışa. Böylece, çetel vatandaşları yarımadanı ziyaret etmek içün Ukrainadan izin almaq kerekler.

XS
SM
MD
LG