Ukraina Tışqı işler nazirligi Frenkistan deputatları eyyetiniñ Rusiye tarafından işğal etilgen Qırımnı ziyaret etmek planlarına munasebetini bildirdi. Nazirlikniñ beyanatında aytıla ki, böyle bir ziyaret içün eyyet Ukrainadan razılıq almadı.
«Frenkistan parlamentiniñ bir qaç deputatı işğal etilgen Qırım Muhtar Cumhuriyetini ziyaret etmege niyetlendi, Ukraina Tışqı işler nazirligi bu ziyaret ukrain tarafı ile muzakere etilmegenini qayd ete», – dep aytıla beyanatta.
Ukraina Tışqı işler nazirligi qayd ete ki, «Frenkistan deputatlarınıñ bu ziyareti mesüliyetsiz bir adım, Ukraina mustaqilligine nisbeten sayğısızlıq, Qırım Muhtar Cumhuriyetiniñ qanunsız işğali boyunca Ukraina qanunları ve Frenkistan ve Avropa birliginiñ siyasetini bozuvdır».
Bu sebepten nazirlik çetel vatandaşlarını Ukraina qanunlarına riayet etip, Ukrainanıñ vaqtınca işğal etilgen toprağına kiriş ve çıqış qaidelerini köz ögüne almağa çağıra.
«Ukrainada nizam bozulması ile bağlı er vaqiağa seslenecekler. Qanunlarnı bozğanlar Ukraina qanunlarına köre cezalanacaq, şu cümleden Ukrainağa kirişleri yasaq etile bile», – dep aytalar Ukraina Tışqı işler nazirliginde.
Berilgen malümatqa köre, Frenkistannıñ 10 deputatından ibaret eyyet bu afta Qırımğa eki künlik ziyareti ile kele – iyül 23-24 künleri.
Eyyet Yalta ve Aqyarnı ziyaret etip, yerli akimiyet ile körüşecek ola. Qırımğa kelecek olğan eyyet reberi Tyerri Mariani bildirdi ki, bu teşebbüs deputatlarğa ait, Frenkistan ükümetiniñ iç bir alâqası yoq.
Ukraina ve Ğarp memleketleri Qırım işğalini tanımay ve Rusiyeni cezalaylar.
2015 senesi iyün ayından itibaren Qırım ile memuriy sıñırnı keçüv yañı qaideleri çalışa. Böylece, çetel vatandaşları yarımadanı ziyaret etmek içün Ukrainadan izin almaq kerekler.
